నియంత

 .                       నియంత 

.                        (విరించి)

ఏకచ్ఛత్రాధి పతిగా 

లోకాలనేనలాలను కున్నాడేమో!

భారత రాజకీయనాయకుల

కుటిల కుతంత్రపు టెత్తుగడలను 

బాగానే ఆకళింపు చేసుకున్నాడు

తానేం చేసినా తానుచితంగా అందించే

ఉష్ణరాశికి, పాదపములకందించే 

పత్రహరితానికి, సౌరశక్తికి మురిసిపోయే

అమాయకులు తన ధాష్టికాన్ని గుర్తించరని

తలపోసాడేమో.....

తన శక్తిని తగ్గించి తొలకరితో ఆరంభమై

జనాలకు హర్షాన్ని కూర్చే వర్షాలను

కురిపించి జనామోదాన్ని పొందుతాడేమో

నని వరుణున్నెక్కడో బంధించేసాడు

బల్లిదులై సామూహికంగా తనచుట్టు చేరి

తనని శక్తిహీనున్ని చేసి తమ ప్రతాపాన్ని

చూపించే జలధరాలనుా పారిపోయేలా చేసాడు

ఇక తనకెవరు ఎదురులేరని

చండప్రచండుడై నిప్పులు చెరుగుచూ

ధరనేలుతున్నాడు

భూ అంతర్జలాలను మూడోకంటివాడికి

సైతము తెలియకుండా జుర్రుకుంటున్నాడు

తనతాపానికి వడదెబ్బసోకి ప్రాణాలు

కోల్పోతున్నా తానిచ్చే ఉచితాలకు 

బానిసలైన జనాలు మౌనంగా 

భరిస్తున్నారేకాని నోరెత్తి ప్రశ్నించరు

ప్రశ్నిస్తే కనుమరుగవుతామని 

తెలుసుకదా! ...... 

కశ్యపాత్మజుడని ప్రత్యక్షనారాయణుడని

ఆనాటినుండి తనకున్న ప్రఖ్యాతిని

అలుసుగా తీసుకొని ఈనాడొక నియంతగా

మారి లోకాన్ని తన తీక్ష్ణ మయూఖాలతో 

కాలంగాని కాలంలోనూ బాధిస్తున్నాడు

సప్తాశ్వరథారూఢుడు.

కరుణించు కంధరమా

             కరుణించు కంధరమా! 

.                       (విరించి) 

తొలకరి పలకరింపగ

పులకించిన పుడమితల్లి

పరిమళ తావులీనెడి 

తరుణము కొరకై వేచిన

హాలికుల యాశలన్నియు

యడియాశలు చేయుచున్న

యంబరవీధిని దాగిన

యంభోదములవిగో

యులకక పలకక

ఉరుములు మెరుపుల ఊసెత్తక

రెట్టించిన ఉత్సాహముతో 

ప్రచండుడై రేగుచున్న

రాగుడి ప్రతాపాగ్నికి

ఆజ్యంపోస్తూ ... తన కర్తవ్యాన్ని

మరచిపోయిన మేఘాల్లారా!

కదనోత్సాహము చూపుచు 

కణకణలాడే కాంకుని జోరు

తగ్గించుచు మీకే తెలియని

మీ శక్తి సామర్థ్యాలను 

వెలికితీసి ....

ఎండి బీటలు బారుతున్న 

ధరణీతలముపై 

హర్షము నిచ్చే వర్షపు నీటి

కళ్ళాపి జల్లగ కురియవెందుకు?

వేదనతో నీ కరుణని కురిపించమని

వేడుకునే హాలికుల వ్యధను బాపవెందుకు?

శ్రీరామనవమి శుభాకాంక్షలు

 .                    *సుప్రభాతం*

. *శ్రీ రామనవమిశుభాకాంక్షలు*

ఆకాశమంత పందిరి

భూలోకమే పీటగా సేసి

భక్తజనాల మనోభావనే

పవిత్రాక్షతలు గా జేసి

వేదపండితుల గళాలు

వేదపనసలు ఘోషిస్తుంటే

భువనైక మోహనుడు

జగదేక మాత కరగ్రహణం

చేసెడు వేళ.........

జగన్మోహన జంట కళ్యాణాన్ని

కన్నులారా చూసినవారిదే

అసలు సిసలైన భాగ్యమని

ఆ భాగ్యాన్ని తానూ సొంతం

చేసుకోవడానికి

తన వంశోన్నతికి మూల పురుషుడైన

ఇనకుల తిలకుడు పరమ

మర్యాద పురుషోత్తముని

పెండ్లిని తిలకించాలని

వచ్చేస్తున్నాడినుడు.

మిత్రమా.....ఉదయించే

ఆ భానున్ని తిలకించుమా.....

నీకిదే *శుభోదయం*

నేస్తమా...నీకూ  *శ్రీ రామ నవమి శుభాకాంక్షలు*

......  ......  ......  .........  ... విరించి 

శుభోదయం

 🌸🌸🌸🌸  శుభోదయం  🌸🌸🌸🌸     

  

నీరజ బంధువాతడు దినేంద్రుడు తానొక యేక చక్రమున్ 

వారము లేడుగాగలుగు వాహ్యమనూరుడు తోలుచుండగా

చేరును ప్రాగ్దిశాద్రులని క్షేమమొసంగెడి వాని రాకకై

వారిజముల్ ద్విపక్షములు పారగతుండ్రును వేచి రెల్లరుల్.        1.

కోటి శరముల దాల్చిన కుతపు డిపుడె

రక్తవర్ణపు పీతాంబ రమును గట్టి

శక్రదిశనుదయించె కింజల్కమందు

మేలుకొనుమింక దినమంత మేలు కలుగు.  2

🌺🌺🌺🌺శుభోదయం 🌺🌺🌺🌺 

శుభోదయం

 ........ 🌺🌅 *శుభోదయం* 🌅🌺 ......

ధారుణి గర్భవాసమున దాగిన భానుని రమ్మటంచు నా

సారస జాతి యంఘ్రియపు శాఖల జేరుచు బిల్చినంతనే 

తూరుపు కొండనెక్కి రవి ద్యోతక మందుచు నుద్భవించె   తా

బేరిమి వీడకుండ భువి వెల్గుల నింపెడు చిత్తమందునన్  

చీకటదియె తొలగె చిరుకాంతి యేజేరె 

పద్మములవి విరిసె పపినిగాంచి

నిదుర వీడుమికను నీకు శుభోదయ

మంచు తెలుపుచుంటి నంటు వనుచు

 🌺🌺🌺🌺🌺🌺🌺🌺🌺🌺         

నాటునాటు ఆస్కారు

 ఘనుడు చంద్రబోసు రచించె కవనమదియె

కీరవాణి యందింప సంగీతమునకు

రామ్ చరణ్ నందమూరియె రమ్యముగను

గెంతు లేసిన పాటయే గెలిచె నేడు

నుత్తమమగు నాస్కారు నీ యుర్వియందు.

పేటపేటను మారు మ్రోగుచు విశ్వమందున గాంచగన్  

నాటునాటను పాటయే కద నాణ్యమై యిల వెల్గెరా

సాటిలేనిది మేటి యంచును సన్నుతింపగ లోకులే 

తేటతెన్గుకు నిట్టిపాటయె తెచ్చెకీర్తిని గాంచరా!!

నాటు నాటంటు పాడిన పాటజూచి

పెదవి విరిచిరి నాడేమొ విజ్ఞులెల్ల

నదియె సాధించె నాస్కారు నద్భుతముగ

తెలుగు పాటకదియె తెచ్చె వెలుగు నిజము.

అమృతవాహిని

 🌹🌹🌹 అమృత వాహినీ 🌹🌹🌹    .           ..                                 (విరించి) 

ఆడది అంటే అమ్మతనానికి చిరునామా

అమృత వాహినీ ఉత్తంబిత తరంగమే అమ్మ

రేపటి తరానికి ఊపిరినందించే

ఉదాత్త రూపమే అమ్మ

అనుగ్రహించడమే తప్ప ఆగ్రహించడ 

మెరుగని అనురాగమూర్తి అమ్మ 

ఎక్కడో పుట్టి మరెక్కడో మెట్టి

రెండుకుటుంబాల శ్రేయోద్ధతికై ఆరాటపడే

యొంటరిజీవి అమ్మ

యుగానికొక్కటి చొప్పననానాడు

ఆదివిష్ణు వవతారెలెత్తాడేమో కాని

ఒకేకాలంలో ననేక యవతారము లెత్తగల

మహిమాన్వితమూర్తి స్వరూపమే

మాతృస్వరూపము

తొలిగురువై వాక్కునందించే వాగ్దేవి యామెయే

ఆకలి వేళ ప్రేమామృతాన్ని రంగరించి

గోటిముద్దలునోటి కందించి ఆకలి తీర్చే 

అన్నపూర్ణ 

భావిపౌరుల భవిష్యన్నిర్మాణానికై 

అణువణువు శక్తిని ధారపోసే శక్తిస్వరూపిణి

అలసి వచ్చిన పతిని సేవించి

సేదతీర్చి ఆనందడోలికలలో 

నోలలాడించే ప్రణయదేవత యామెయే

సంసార సాగరాన్నీదడంలో 

పెనిమిటికి తగు సహాయ సహకారాలందించే

బృహస్పతి స్వరూపమామెయే 

ఇంటెడు చాకిరీని విసుగనక చేసె 

విత్తమాశించని కట్టు బానిస యామెయే

కూర్మి వహించి అత్తమామలను

తల్లిదండ్రులుగా తలచి సేవించి ప్రేమానురాగాల

పంచు అపురూప మనస్కులూ ఆడవారే 

ఆడది లేని యిల్లు అడవితో సమానం 

అతివయె లేనినాడు అభివృద్ధియె శూన్యం

అతివ లేనినాడు అవని లేదు.

శుభోదయం

 🌅🌅🌅🌅  మేలుకొలుపు  🌅🌅🌅🌅

నేడు తానుదయింప నెత్తమ్మి విరివిందు

.               వ్రాలెనిన్ననె గాదె పశ్చిమాన

కంజహితుడు జేరు కాలమాసన్న మై 

.      యిరులు భీతిల్లుచు పరుగు లెత్తె

వెలుగు చీకటులట పెనుగులాడెనొ యేమొ

.         రోదోంతరమ్ముకె రుధిరమంటె 

తల్లిపాలకొరకు తర్ణికములరిసె 

.          మొగవాలమిట వేచె ముగ్గుకొరకు

భాస్కరునికంటె ముందుగ వాయసమ్మె

యీల వేసి ధరణినది మేలుకొలుప 

భంగ మయ్యె నిశ్శబ్దమే వసుధ యందు

కాల చక్రమాగక తాను కదలు చుండె.

🌺🌺🌺🌺  శుభోదయం 🌺🌺🌺🌺

నూత్న ఆంగ్ల సంవత్సర శుభోదయం 2023

 🌅🌅🌅🌅  *శుభోదయం*  🌅🌅🌅🌅

కలకలమును రేపి కన్నీరు కురిపించి

.          నట్టిఖలు కరోన నడ్డుకొనుచు

శోకముందీర్చుచు శుభముల నందించి

.           వెతల దీర్చినతల్లి వెడలి నేడు

కోటియాశల మూట కొంగుకు కట్టుకు

.           వచ్చిచేరెను నూత్న వత్సరమ్ము

ధరణినేలగ వచ్చె నిరువది మూడది

.            స్వాగతింప వలయు సంతసమున

క్రొత్త వత్సరమున కుంభినిన్ మేల్కొల్ప

నిరుటి భానుడేను తిరిగి వచ్చె

నిదుర వీడు మిదియె నీకు శుభోదయ

మనుచు తెలుపు చుంటి హార్దముగను.

🌺🌺🌺🌺  శుభోదయం 🌺🌺🌺🌺

2023 నూతన సంవత్సర శుభాకాంక్షలతో. ..,

.   ....    .....     ......     ......     మీ విరించి.

సంక్రాంతి శుభోదయం

 *సంక్రాంతిశుభాకాంక్షలతో శుభోదయం*

 మాసానికొకమారు వాసమున్ మార్చెడి

 .        కర్మపు సాకిరి కంజ హితుడు

 ధనుసు రాశిని వీడి ఘనముగా మకరమ్ము

 .       సంక్రమణము జేయు సంబరమున

 కోడికూయకముందె కోమలుల్ మేల్కొని

 .        సప్తసప్తిని తాము స్వాగతింప 

 ముంగిట ముత్యాల ముగ్గులన్ వేయుచున్

 .     గంగిరెద్దులనాట్య భంగిమలును 

 హరిలొరంగాయంచు హరిదాసు కీర్తనల్

 .        ద్రాపమున్ దాకు పతంగ ములును

 పట్టు వస్త్రాల రెపరెపల రవళులు

.      నింగిలో భాస్కరున్ నిదుర లేప       

  

  తే.గీ.    

 తూర్పు కొండల నెగబ్రాకి తొవలసూడు

 పౌరుషాగ్నుల విరజిమ్ము పందెములగు

 కోళ్ళ సంగరమును గాంచు కోర్కెతోడ

 కదలి వచ్చెనుచూడు సంక్రాంతి నాడు. 

( మీకూ మీ కుటుంబానికి మకర సంక్రాంతి శుభాకాంక్షలు)

నా తెలుగుభాష

 

శుభోదయం

 🌅🌅🌅🌅  *శుభోదయం*   🌅🌅🌅🌅

కువలయమ్మును మేలు కొలుప తానెంచుచున్ 

.           కోకిలమ్మలు పాడు కూజితముల

నాలకింపగనెంచి యాదిత్యుడె కదలి

.          యుదయాద్రి నెగబ్రాకి కదలివచ్చె

కళుకుల కోటితో గగనము కేతెంచె

.          డివముసూడును గాంచి యిరులు పారె 

నలుపు చీకటి తోడ వెలుగు తెలుపుకల్సి

.          రమణీయ వర్ణమున్ ఖము ధరించె 

ఇరుల ముద్దు లాడ నిచ్ఛతో నుదయాన

తూరుపు దిశ జేరె తొవలసూడు

చీకటమ్మ గాంచి సిగ్గిల్లు రీతిన

నెరుపు రంగు దాల్చి తరణి వచ్చె.

.         

🌺🌺🌺🌺  శుభోదయం 🌺🌺🌺🌺

శుభోదయం

 🌅🌅🌅🌅  *శుభోదయం*   🌅🌅🌅🌅

ఆర్తితో కగరాశి యాదరమ్మున బిల్వ

.          నరుదెంచె భానుడే యిరుల ద్రుంచ

యందాల బాలుడై యానంద ముప్పొంగ

.          పూర్వాద్రులన్ జేరె పుడమినేల

కిరణాలె శరములై యురముఁ గ్రుచ్చినవేమొ 

.          గగనమే సిగ్గిల్లె కాంచరండి

సింధూర వర్ణమే చేరఁ నభమునకు

.        చీకట్లు భీతిల్లి చెదరి పోయె 

అంథకారమువిడనజ్ఞానమే తొల్గు

కాంతి రేఖ విరియు కాల మేను

నలుపు చెరగి పోయి తెలుపు వర్ణము నిండె 

నిన్న కరిగి పోయి నేడు చేరె.

  

🌺🌺🌺🌺  శుభోదయం 🌺🌺🌺🌺

శుభోదయం

 .           *శుభోదయం*

నల్లని సిగ్గుతెర కప్పుకుని

నిద్రిస్తున్న ధరణి అందాలను

కాంచాలనే కోరికతో కర్మసాక్షి

తూర్పు కొండల మాటునుంచి

తొంగిచూస్తుంటే .....

అతని కన్నులొలికే కాంతిరేఖలు

పుడమిని స్పృషిస్తున్న వేళ

గోరువెచ్చని యా వెలుగు సోకి

కొమ్మలలో నిద్రిస్తున్న పక్షులు

కువకువరాగాలతో గారాలుపోతున్నాయి

సెలయేరులలోని పద్మాలు

తమ ఆత్మీయుని కరస్పర్షకు

పులకించి తనువంతా విప్పుకుంటుంటే

పరాయిపురుషుని గాంచిన

కలువలు సిగ్గుతో ముడుచుకుంటున్నాయి.

మిత్రమా భిన్నవర్ణశోభితమై

విరాజిల్లే నింగి యందాలు చూడాలంటే 

నీ పద్మనయనాలని వికసించనీ

సకలశోభాయమానమౌ ప్రభాత

భాస్కరున్ని తిలకించ మేలుకోవేమి

నీకు నాకు సకల చరాచర జీవరాశికిదే కావాలి శుభోదయం.   

నువ్వే నువ్వే ముమ్మాటికి నువ్వే

నువ్వే...నువ్వే...నువ్వే...ముమ్మాటికినువ్వే!

రాజకీయాలకు అవినీతి డిఫాల్టు
అన్యాయాక్రమాలు డౌనులోడులు
అవినీతన్నదే లేనినాడు రాజకీయానికి
అస్తిత్వం లేదు....మనం ఒప్పుకోము

బురదగుంట బురదగుంట అంటూనే
మనమే దానిని రొచ్చుగుంటను చేస్తున్నాం
పొరపాటున నీతిమంతులీ రంగాన కాలిడీతే
బురదలోకి లాగుతున్నాం లేదంటే
శంకరగిరి మాన్యాలకు పంపేస్తున్నాం

ఐదు నిమిషాలైనా ఆలోచించి వేసే
ఓటు కావాలి ...అది అవినీతికి వేటు....
కాని ఆలోచిస్తున్నామా మనం!!
లేదే....,,మనకంత తీరికెక్కడిది!

మనఓటు కాకూడదు అపాత్రదానం
ఉందా యెవరికైనా ఈ మాత్రపు జ్ఞానం
వేసే ప్రతీఓటూ అర్హత నెరుగని అర్భకునికైతే
అది అపాత్రత కాకుంటే పాత్రతెలా అవుతుంది?

ఉచితంగా నువ్వేయాల్సిన ఓటుకే
నోటునాశిస్తుంటే.... అవినీతి కి
ఆరంభమదే......
మూలంలోనే నీతి మృగ్యమైతే  ఇంకా
అవినీతి అంటూ ప్రేలాపన లెందుకో!!

ఏనేత చరిత్ర చూసినా యేమున్నది
గర్వకారణం
అడుగడుగున అవినీతి అక్రమాల
సంచితం
యెందెందు వెదకి చూచిన అందందే
గలరు
అవినీతి పరాక్రమ వీరాగ్రేసాసురులు

నీతి నీతి అనుచు నీవు
అవమానించకు.........
ఈ రాజకీయ వ్యవస్థని

ఓటునమ్ముకున్న నాడే
ఊడెను నీకా అధికారం 

భ్రష్టుపట్టిన వ్యవస్థకు
ఫస్టు కారణమే.... నీవు


వనిత విశ్వరూపం

వనిత విశ్వరూపం

నవతరానికి నాందియై
భావి తరాలకు పునాదియై
నవ జీవన శకానికి ప్రాణాలూదే
మమతాను రాగాల మూలవిరాట్టుయై
త్యాగానికి చిరునామాగా నిలిచే
అపర దైవ స్వరూపం అతివ స్వరూపం

నవ జీవన రూపకల్పనా క్షేత్రమై
జీవామృత సుధా రసధారా విలాసమై
మమతానురాగాంకుర ప్రదీపమై
త్యాగానికీ పర్యాయ పదమై
దైవానికి ప్రతి రూపమై
ఇలలో వెలసిన దివ్య స్వరూపం
ఇంతి స్వరూపం

అమ్మదనం లోని మాధుర్య మకరందపు
కమ్మదనాన్ని పంచే అమృత వాహిని
అనురాగ జలధిలో ఓలలాడించి
ఆప్యాయతానురాగాలను నేర్పే అక్షయప్రదీప్తి
సృష్టికే అమరత్వాన్నందించి సకల చరాచర
సృష్టి జీవన గమనానికి ప్రాణదాత ఈ ప్రణవ మూర్తి

మదిలో వెలిగే దేవుడు

మదిలొ నిలిచిన దేవుడు

నాన్నా!
నాలోని నా అన్న వ్యక్తిత్వాన్ని
పెంచేవాడవనే కదా నిన్ను నాన్నా
అని పిలిచింది

ప్రతీ మనిషికి అమ్మ
దేవత నాన్న దేవుడు
ప్రాణి పుట్టుకకి అమ్మ
క్షేత్రమైతె నాన్న బీజం
బీజమే లేని ఏ క్షేత్రం
ఫలించదు కదా నాన్నా!

అమ్మ పదినెలలు కడుపులో
పెట్టుకు కాపాడితే
నువ్ జీవితమంతా భుజాలపై
మోస్తూ కంటిపాపలా కాపాడావే
నీ యెదపై భారమైనా
యేనాడూ అలసటన్నది
నీదరికీ రానీయనే లేదే

నా పొట్ట నింపడానికి 
ఆరాటపడేది అమ్మైతే
నలుగురి పొట్టలు నింపగలిగే
శక్తీనీ నాకిచ్చే యత్నానికే గా నువ్
తాపత్రయ పడింది

భగవంతుడిచ్చినవి మాకు రెండైతే
మూడోకన్నునిచ్చిందీ నీవుకాదా
దేవుడిచ్చినవి రెండూ అమ్మానాన్న
లైతే నువ్వించిన అదృష్యాక్షువు
జ్ఞానం కాదా నాన్నా!!

నాన్నా! ప్రత్వక్ష దైవానివై
నా రూపానికి మనసుకు
మూలకారకునివై అనుక్షణం
నాయెదుగుదలకు హార్మ్యానివై
కనుసైగలతో మము నడిపించావ్

నీ చేతి స్పర్షచాలు ఈ విశ్వాన్నే
జయించే విశ్వాసం....
నీ పలుకు చాలు అఖండ సామ్రాజ్యాన్ని
జయించగల నవొత్తేజాంకుర భావం

నీవు మము వీడిపోయావని
అందరూ అంటున్నా
యెక్కడికీ వెళ్ళలేదని
వెళ్ళలేవని నామనసుకు
తెలుసు
నామది జ్ఞాపకాల దొంతరవై
హృదయ తరంగ రవళివై
నా ప్రతి కదలికకూ రక్షవై
నా భవితకు సోపానానివై
నిలిచివున్నావని లొకానికి
యెలుగెత్తి చాటాలనుంది

నువ్వు మము వీడి వెళ్ళావు నువ్వు
నువ్వు తప్ప తక్కినవన్ని వున్నాయ్ !
కానీ నీకక్కడ యెవరున్నారు నాన్నా
ఒంటరివై యెంతటి క్షొభననుభ విస్తున్నావో!!

నువ్వున్నన్నాళ్ళు మా కళ్ళని
చెమర్చనీయనే లేదు
నువులేని నేడు కంటిలో చెమ్మ
ఆగడమే లేదు
కొండంత అండను కోల్పోయి
దిక్కులేని పక్షులమే అయినా
నువ్ నేర్పిన సంస్కారం నీవిచ్చిన
ఆత్మస్థైర్యం మాకు యెల్లకాలం రక్ష.



పోతుటీగలున్నాయ్ జాగ్రత్త

పోతుటీగలున్నాయ్ తస్మాత్ జాగ్రత్త

మమతల మాగాణిలో విరబూసిన
పరిపుష్ఠ మకరంద మందారాలను
గాంచి, మధుర మకరందాన్ని గ్రోల వచ్చె
కొదమతేటులెన్నో...యెన్నెన్నో.........

బంబరాల భ్రమరనాదాలు
సప్తస్వరాల నొలికిస్తూ
మైమరపిస్తాయి.......
రకరకాల విన్యాసాలతో
నిను పరవశింప జేసి
మత్తులో ముంచెత్తుతాయ్ ...
విరులనితమ మధురనాదాలతో
మురిపించి మైమరపించి
మకరంద స్వాదనానంతరం
నినువీడి మరో సుమానికై
వెదుకుతూ  సాగిపోయే
పోతుటీగ లెన్నో .......యెన్నెన్నో......

కుసుమ కోమలమైన పుష్ప
రాజములారా! పూబంతులారా!!
తస్మాత్ జాగ్రతో జాగ్రతా!!

పైపై మెరుగులు మత్తుగొలపే మాటలు
మేకవన్నె పులులు మేధినిపై కోకొల్లలు
కాలికి గాయమైతే మందుపూయను వచ్చు
గాయాన్ని మాన్పనూ వచ్చు.....
మనసుకే గాయమైతే మానిపే మందేది?
బతుకుకే చిల్లు పడితే పూడ్చే మాకేది?

పైపై మెరుగులు కాదు ....
దేవుడిచ్చిన ఆకారం కంటే
సాధనచే సాధించుకున్న సంస్కారం సద్గుణాల కాంచు
అంది పుచ్చుకున్న ఆ  కరం  ఆసాంతం తోడుగా
వుండేలా గమనించు...హృదయాన్నే పరికించూ

అస్తమించిన అమ్మానాన్నలకో లేఖ

అస్తమించిన అమ్మా నాన్నలకో లేఖ

ఓ అమ్మా! ఓ నాన్నా!!

బ్రతికున్నన్నాళ్ళు
పలకరించని వాడు
ఇప్పుడీ ఉత్తరం రాయడమేంటనీ
ఆశ్చర్యమా?

నేనానాడు మిమ్మెల్నెంత
అనాదరించానో
నాకీనాడే అర్థమైంది,
తప్పుతెలుసుకుని
మీ పాదాలపైబడి
ప్రాయశ్చిత్తం చేసుకోవాలని
ఉన్నా నాకందనంత దూరంలో వున్నారే!!

ఒక్క సారి మీ ఒడిలొ
తలవాల్చి బోరుమని
ఏడవాలని వుంది
నాకన్నుల్లోంచి వచ్చే
పశ్చాత్తాపాశ్రువులతో
మీ పాదాలను కడిగీ
ఆనీటినీ తలపై జల్లుకోవాలనీ వుంది.......

జ్ఞానమనే  ముసుగును
కప్పుకున్న అజ్ఞానిని
అద్దంలాంటి మీ మనసుల్లొ
నన్ను నేను చూసుకుని
మీరే అజ్ఞానులని భావించిన అహంభావిని నేను

అనుభవాల పొత్తాలైన
మీ మంచి మాటలని
చాదస్తాలని యెగతాళి
చేసిన అవివేకిని నేను

నా భార్యా బిడ్డలే
నా లోకమని మీరంతా
వయసుడిగిన
అక్కరకురాని వృద్ధ జీవులని
అడుగడుగునా కించపరచిన
కిరాతకుడిని నేను

ఏ ఒక్క నాడూ మీతో
నవ్వుతూ   మాటాడలేదు
ఏ ఒక్క నిర్ణయాన్నీ మీతో
చర్చించి గైకొనలేదు
ఏ ఒక్కనాడూ మీతో కలిసి
భోజనమూ చేయలేదు

మీరిచ్చినదే ఈ జన్మని మరిచి....
మీరు యిప్పించిన జ్ఞానాన్ని విడిచి..
.మీరు నేర్పించిన సంస్కారాన్నీ కాదని
యౌవనపు కోరికల బందీనై.........

మీకిష్టం లేని ప్రేమవివాహం చేసుకుని
మిమ్మల్నే శత్రువులుగా భావించి
అనుక్షణం ద్వేషించాను... నాసుఖం
కోరేమీరు నా పెండ్లిననుమతించి కోడలిని
ఆశీర్వదించిన నాడు అవమానించాను.

నాకొరకు నా భార్యను
కొడలిగా స్వాగతించారు
అభిమానించారు ఆదరించారు

యెక్కడా దిక్కులెక దిగివచ్చారని
తూ  లనాడాను
అమ్మానాన్నలన్న ఇంగితాన్ని
మరిచాను...
మీ మనో వేదన గూర్చి ఆలొచించని
పెను రాయినయ్యాను
పశువునయ్యాను.....

చరిత్ర పునరావృతమౌతుంది
భూమి గుండ్రంగా వుండి తన
చుట్టు తానే తిరుగుతుంది.కదూ!

నా కొడుకులూ కోడళ్ళు మము
నిర్లక్ష్యం చేస్తుంటే.... నా మనసు
పడుతున్న ఆవేదనలొ
జ్ఞానోదయమైంది
నేనూ మిమ్మల్నెంత అవమానించానో

మేడలడగ లేదు మీకున్నదే మాకిచ్చారు
మూటలడగ లేదు మీ సంపాదనే నాకిచ్చారు
కేవలం ప్రేమ పంచమన్నారు
మనిషిగా చూడమన్నారు

ఆనాడా మాటల విలువ నెరగలేదు
కాని తెలివొచ్చేసరికి అంతా అయిపోయింది
పశ్చాత్తాపంతో కుములుతున్నా....

అమ్మా ! నాన్నా!! క్షమించమని అడిగే
అర్హతను సైతం కోల్పోయిన దుర్మార్గున్ని
అమృతమయమైన మీ మనసుతో క్షమించరూ!

కొడుకుల ప్రవర్తన చూసి బుద్ధి
తెచ్చుకోకండనీ ఈ తరానికీ చెబుతున్నా
మీరూ మారండీ అమ్మా నాన్నల్ని
గౌరవిస్తేనే మీ పిల్లలు మిమ్మూ
ప్రేమిస్తారని గుర్తుంచుకొండనీ
చెబుతున్నానమ్మా ఇదే నేను
మీపట్ల ఒనరించిన పాపానికి
ప్రాయశ్చిత్తం అమ్మా! నాన్నా!

వివక్షలేని లోకాలకై

వివక్ష లేని లొకాలకై అణ్వేషిస్తున్నా!!

వ్యధాభరితమై  బాధాతప్తమై
భావాభావమై ఎడారిగా మారిన
నా ఎదలోకి సైమానువై
ప్రవేశించావు ప్రేమ ఊసులతో

వ్యధలను సమాధి చేసి కరుణ వర్షాన్ని
కురిపించి, నిర్భావ ఎడారినే
అనంతభావాల ప్రేమ
సాగరంగా మార్చావు

ఘనీభవించి నిశ్చలమైన
భావపాషాణాన్ని నీ అమృత వాక్కులతో
కరిగించి ద్రవింప జేసావు.........

భావవాహినీ తరంగాలు
ఎగసిపడుతున్న నా హృదయ
సాగరంలో ప్రేమ సునామీనే
సృష్టించావు

ఎగసిపడే
ఆ ప్రేమతరంగాలలో
తడిసీ ముద్దయ్యాను

ఓ సఖీ!!

జీవచ్ఛవాన్ని స్పృషించి
పునరుజ్జీవితున్ని జేసి
కనపడకుండా పోయావు

అనంత వాహినీ కెరటాల ఝరులకి
తట్టుకోలేక కొట్టుకు పోతున్న నేను
నీ ఆసరాకై చేయి జాపుతున్నా.......
నిర్దయగా చూస్తున్నావే తప్ప
నాచేయి నందుకొని నన్ను కాపాడవెందుకు

కుల మత జాతీ వివక్షలే
నను నీ నుండి వేరుచేస్తే
ఈ అనంతాంతరాలున్న
అనంత విశ్వాన్నే నేను
బహిష్కరిస్తున్నా....
ఈ వివక్షలే లేని లోకాలకు
పయనమౌతున్నా
ఉన్నదో లేదో తెలియని
మరోజన్మలో నీకై వేచివుంటా