వసంతగానం

                                                                   వసంత గానం
                                                                              విరించి

శీతలా నిలముల శిశిరంబు మరుగాయే
                        మండు వేసంగియే మరలి వచ్చె
అభిసారికై ధాత్రి అందాల ప్రియుడైన
                        వరుణు కై వేచియే వ్రయ్యలయ్యె
కొదమ తేటుల ధాటు మధువు నన్వేషింప
                        పూదోట దిరుగంగ పూవు పూవు
బంబరంబుల పక్ష భ్రమర నాదాలతో
                       భూపాల రాగాలు పోటులెత్తె
       భాను తప్త మైన వాయువుల్ చెలరేగి
       వేడి వడిన వీచు వేళ ఇదియె
       వసుధ నే రమింప వడగండ్ల వానయై
       వరుణ దేవు డిలకు వచ్చు నిపుడు
నిరుడు కూసిన పిట్ట సరిగమ రాగాల
                     తిరిగి యాలాపించు వేళ ఇదియె
నవ పల్లవంబుల నవ నవోణ్ మేషంబు
                     నేలనే మురిపించు వేళ ఇదియె
ఖగ జాతి కువ కువల్ కమనీయ దృశ్యాల్
                     మేళవింపుల మేటి వేళ ఇదియె
మంచు తెరల్ తొల్గి మరులు గొల్పెడు రీతి
                    కౌముదుల్ విరిసేటి కాలమిదియె
          పడతి తనువు జేరు పరువాల వాలేను
          వంపు సోంపు లన్ని వసుధకమరి
          కులుకు లీనుచుండె కువలయ మీవేళ
          మదిని దోచు మాస మాగ మించె

పల్ల వించిన నవ పల్లవంబుల చేత
          పాదపముల శోభ పరిడ విల్లె
విరియ కాసిన ఫల బరువుచే మావిళ్ళు
          నిండు చూలాలున్న నెలత లయ్యె
పూప పల్లవముల పొట్టార భుజియింప
           కలకంటి కంటాన కలిమి నిండె
మురిపాన గళమెత్తి మోహన రాగాన
           స్వాగాతాల్ పల్కె వసంతమునకు

           పులుగు పాటతోడ పులకరించిన నీవు
           వసుధ మురియు నిండు వర్ష మిచ్చి
           పాడి పంటల నిచ్చి పసిడి రాశుల నిచ్చి
           శాంతి నొసగు మో వసంత కాంత