ఫలహార శాల

                                              ఫలహార శాలలు                                                            రచన: విరించి

     క్షుధానల దగ్ద మూర్తుల క్షుత్తు లార్పు చిత్తముతో
     క్షితిజోపరి తలమందున అన్నార్థుల విత్తముతో
     నాటి పలనాటి నాటి చాప కూటి స్పూర్తితో
     వెలసినవీ  హోటళ్లు అల్పా హార లోగిళ్ళు .

     జిహ్వ చాపల్యుల కవి శ్వసుర గృహ నివాసాలు
     జాతి సమైక్యత కవి చక్కని తార్కాణాలు
     కులాల కుచ్చితాలు మతాల దారుణాలు
     మచ్చు కైన సోకనట్టి ఉపాహార దుకాణాలు.
     అలసి సొలసి దరి చేరిన ఆహూతుల సేద తీర్చి
     ఆకలితో అలమటించు అన్నార్థుల బాధ తీర్చి
     ఇష్ట కామ్యార్థ మెరిగి అందింతురు పేర్చి పేర్చి
     అతిథులనే ఆదరించి  పూజింతురు కొలిచి కొలిచి
     ఇనుప గజ్జెల తల్లి ఇష్ట సుతుల కొరకు
     గుడిసె లందు వెలసినవి పేదవారి సేవ కొరకు
     మధ్య తరగతి మానవుడను మన్ననతో సేవించగా
     హై క్లాసు పెరుతోని అవతరించె నవనియందు

     కాసులున్న కామాంధుడి కాంక్ష తీర్చు నెపము తో
     నక్షత్రాలను చూపే నగరాలలోన వెలసె
     అర్థాకలి అర్భకులకు నేత్రానందం సలిపే
     అర్థ నగ్న నృత్యాలతో అలరించే శాలలివే.