కాలాన్ని క్యాసెట్ గా చేసి
కాలయంత్రంలో వేసి
మనం కోరుకున్న కాలానికి
చేరుకునే వీలుంటే
యెంత బావుండేదో!!
తెలిసీ తెలియని తనంతో
అమ్మ అంటే యేమిటో తెలియని
ఆ చిన్నారి ప్రాయంలో
నా అల్లరి చేష్టలతో ఆమెనెంత
విసిగించానో! ..తెలుసుకుని
క్షమించమని అడగాలనుంది
యౌవనంలో మిడిమిడి జ్ఞానంతో
నేనే తెలివిగల వాడినన్న భ్రమలో
పాతరోతనీ విసుగు దలతోకించపరచి
అనాదరించిన ఆరోజులలోకి పయనించి
క్షమించమని అడగాలనుంది
నాన్న భుజాల నెక్కి తిరగాలనీ
నాన్న కళ్ళతో నాయిా భవిష్యత్తు
లోకి తొంగి చూడాలని అతని
వేలుపట్టుకొని అడుగులు వేస్తూ
ఈ ప్రపంచాన్ని మరో సారి చూడాలనీ
నాన్న యదపై సోలి
అభద్రతా భావానికే
అభద్రత నిచ్చిన ఆ ధైర్యాన్ని
తిరిగి పొందాలని వుంది
అమ్మా నాన్నల సాన్నిధ్యంలో
బాధ్యతెరుగని బాల్యాన్ని మరోసారి
నిండుగా ఆస్వాదించాలని
బాధ్యత నెరిగి వారి ననాదరించిన
నా తెలివిహీనతకు ప్రాయశ్చిత్తాన్ని
చేసుకోవాలనీ వుంది
No comments:
Post a Comment