ధర్మమెరిగినట్టి కర్మయోగి హనుమ
కుడ్యమున్ దాటగన్ గోడనెక్క
లంకాధిదేవత లంకరాక్షసచట
కాపుకాచుచు నుండే కపిని గాంచె
ఎవడవీవు యిటకు యేలవచ్చితివీవు
ప్రాణాలపై యాశ వదలుకొమ్ము
చావుమూడెను నీకు సత్యాన్ని వచియింపు
మనుచు లంఖిని వచ్చె నతని కడకు
ఏల కోపమమ్మ ఇలలోన ఇంపైన
పట్టణంబకాంచ వచ్చితేను
వీధి వీధి గాంచి వెడలిపోదును నేను
అనుమతించవమ్మ అసురమాత
అనెడు హనుమ మాట నాలకించక లంక
చాచి పెట్టి ఒక్క చరుపు చరిచె
ఆడవారిపైన ఆగడ మేలంచు
వదలినాడు ఇంత వరకు నతడు
అసుర ముష్ఠి ఘాత మాగ్రహంబును పెంచ
కనులు యెరుపు దాల్చె తనువు బిగిసె
పడతి పైన నేల బలముచూ పడమంచు
ముష్థిని విసిరెనామె ముఖము పైకి
పవన సుతుని దెబ్బ ప్రాణాంతకం బాయె
గావుకేక తెచ్చె చావు తెలివి
కరములోడ్తు నీకు కపివరుండా నీదు
దర్శనంబు నాకు ధన్యతొసగు
రామ పత్నిని వెదుకుచూ రామబంటు
కపియె వచ్చును శ్రీలంక కడలి దాటి
నిన్ను గెలుచును కదనాన నిజము సుమ్ము
అసుర జాతియె యవనిపై నంతరించు
ధాత తెలిపెను నాకు దయతోడ నొకనాడు
పురము రక్ష జేయు తరుణమందు
నన్ను గెలుచు వాడు నాశనమొనరించు
లంకపట్టణమును రక్కసులను
No comments:
Post a Comment